Заканчэнне Карнавалу ў Лучаі PDF Печать E-mail
27.02.2017 17:36

Фотагалерэя

Згодна з традыцыяй нашых продкаў, апошні тыдзень Карнавалу павінен быць найбольш радасным і багатым на розныя забавы, прысмакі, бо наперадзе чакае Вялікі пост. Даўней, напярэдадні Пепельнай Серады закідвалі цымбылы, скрыпку, гармонік дзесьці на шафу, каб пасля саракадзённага посту з большай радасцю ізноў танцаваць, спяваць.

DSC 0219 cr
У нашы часы адноўлена традыцыя праваслаўнай Масленіцы, калі па ўсіх гарадах і мястэчках збіраюць людзей на традыцыйнае прадстаўленне. А вось католікі Лучая штогод маюць магчымасць паўдзельнічаць у заканчэнні Карнавалу: звычайна адбываецца пасля святой Імшы імпрэза з удзелам таленавітых артыстаў, паэтаў. Сёлета пробашч Лучая вырашыў зрабіць заканчэнне Карнавалу запамінальным не толькі для сваіх парафіянаў. Па яго ініцыятыве быў арганізаваны канцэрт з удзелам хрысціянскага гурта "Laudans" і арт-групы "Беларусы" з Мінска. Адбывалася імпрэза ў пастаўским Доме культуры. Гледачамі сталі, не толькі жыхары горада, але і парафій Пастаўшчыны. Не адмовіліся ад запрашэння і пастаянныя ўдзельнікі лучайскіх святаў – землякі ксяндза Мікалая з Шаркаўшчыны. На свяце прысутнічалі таксама і святары: ксёндз дэкан Павел Самсонаў з Дунілавічаў, ксёндз Анджэй Бульчак з Паставаў.

DSC 0037
Гурт " Laudans" прадставіў некалькі твораў на словы святога Яна Паўла ІІ і нашай паэткі Ірыны Багдановіч. Выступ хрысціянскага гурта прадугледжвае заўсёды высокадухоўныя песні. Часам, зразумелыя і даступныя для ўспрыняцця не кожнаму слухачу. Дарэчы, незадоўга да канцэрту Андрэй Лугін і Алёна Плачанская ўпрыгожылі сваім спевам Лутургію ў Лучаі.
Знакамітая арт-група Беларусы проста запаліла залу. Багаты рэпертуар быў прадстаўлены і класічнымі творамі, і народнымі, і эстраднымі. Здаецца артысты змаглі задаволіць любы музычны густ. Уразіла тое, што кіраўнік і саліст гурта Валерый Шмат каментаваў многія творы, звязваючы іх са Збаўцам, з гісторыяй хрысціянства. Дарэчы артыст з'яўляецца яшчэ і найлепшым у нашай краіне арганістам. Насалодзіцца яго выкананнем вернікі і госці Лучая маглі летась падчас фэсту святога Тадэвуша. Важна, што Валерый Шмат валодае інструментам не толькі выконваючы класічныя творы, але несамавіта грае і спявае падчас Літургіі.

W6mTw1O-z4c cr
Вялікую ўдзячнасць за ідэю правядзення цудоўнага свята выказваюць землякі лучайскаму пробашчу. Бо змаглі не толькі ўзбагаціцца духоўна, культурна, але і спаткацца са сваімі добра знаёмымі пілігрымамі, з якімі неаднаразова здаралася быць разам падчас розных вандровак, арганізоўваць якія ксёндз Мікалай мае выдатны талент і жаданне. Здаецца, як адна вялікая сям'я, віталіся, узгадвалі мінулыя пілігрымкі. Назапасіўшы цудоўныя ўспаміны ад незабыўнага канцэрту, ад шчаслівай сустрэчы з братамі-пілігрымамі, будзем перажываць Вялікі Пост.

Асаблівая падзяка святарам і ўсім валанцёрам, хто дапамог сабраць усіх нас разам на гэта свята.

А ўжо ў першую нядзелю пасля Вялікадня: 23 красавіка Лучай запрашае на Свята Божай Міласэрнасці.

 

Тэкст: Алена Клімза-Колтан
Фота: Міхаіл Тарасёнак

 

Галоўная   Фотагалерэя   Гiсторыя   Кантакты   Мапа сайта 

Рыма-каталіцкая парафія Св.Тадэвуша Апостала ў в.Лучай Пастаўскага раёна

211852 в.Лучай, вул.Cадовая 10/1, Пастаўскі раён, Віцебская вобласць, Рэспубліка Беларусь

Тэл./факс: +375-29-803-78-44; e-mail: luchaitadeusz@gmail.com

Выкарыстанне матэрыялаў дазваляецца пры ўмове спасылкі на luchai.by

 

© 2012-2017 Парафія св. Юды Тадэвуша ў в. Лучай